ವಿದ್ಯಾರ್ಥಿಗಳ ಸೃಜನಶೀಲ ಕಲಿಕೆಗೆ ಸಾಕ್ಷಿಯಾದ ಫ್ಯಾಷನ್ ಶೋ ವೇದಿಕೆ

 ವಿದ್ಯಾರ್ಥಿಗಳ ಸೃಜನಶೀಲ ಕಲಿಕೆಗೆ ಸಾಕ್ಷಿಯಾದ ಫ್ಯಾಷನ್ ಶೋ ವೇದಿಕೆ 

ಬೆಂಗಳೂರು, ನ. 23: ನಗರದ ಕೋರಮಂಗಲ ಕ್ಲಬ್‌ನಲ್ಲಿ ವಿದ್ಯಾರ್ಥಿಗಳಲ್ಲಿನ ವಿನ್ಯಾಸ ಕಲೆ,  ಸೃಜನಶೀಲತೆ, ನಾವೀನ್ಯತೆಯನ್ನು ಗುರುತಿಸುವ ನಿಟ್ಟಿನಲ್ಲಿ ʼಲೀವ್ ಇನ್ ದಿ ಮೂಮೆಂಟ್ʼ ಎಂಬ ಥೀಮ್‌ನೊಂದಿಗೆ  ಫ್ಯಾಷನ್‌ ಶೋ ಕಾರ್ಯಕ್ರಮವನ್ನು ಜೆಡಿ ಇನ್‌ಸ್ಟಿಟ್ಯೂಟ್ ಆಫ್ ಫ್ಯಾಷನ್ ಟೆಕ್ನಾಲಜಿಯು ಆಯೋಜಿಸಿತ್ತು. ಉತ್ತಮ ವಿನ್ಯಾಸ ರೂಪಿಸಿದ ವಿದ್ಯಾರ್ಥಿಗಳಿಗೆ 2025ರ ಉತ್ತಮ ವಿನ್ಯಾಸ ಪ್ರಶಸ್ತಿ ಪ್ರದಾನ ಮಾಡಲಾಯಿತು. ವಿದ್ಯಾರ್ಥಿಗಳ ನವ ವಿನ್ಯಾಸಕ ಉಡುಪು, ಜ್ಯುವೆಲ್ಲರಿ ಸೇರಿದಂತೆ ಇತರೆ ಅತ್ಯಾಕರ್ಷಕ ವಸ್ತುಗಳನ್ನು ಪ್ರದರ್ಶನಕ್ಕೆ ಅವಕಾಶ ಮಾಡಿಕೊಡಲಾಗಿತ್ತು. ಈ ಮೂಲಕ ವಿದ್ಯಾರ್ಥಿಗಳ ಪ್ರತಿಭಾ ಪ್ರದರ್ಶನಕ್ಕೆ ಮತ್ತು ಫ್ಯಾಷನ್‌ ಜಗತ್ತಿನ ಪರಿಚಯವನ್ನು ಮಾಡಿಕೊಡಲು ಬೃಹತ್‌ ವೇದಿಕೆಯನ್ನು ಕಲ್ಪಿಸಿಕೊಡಲಾಗಿತ್ತು.

ಕಾರ್ಯಕ್ರಮವು ದಿ ಸ್ಟೈಲ್ ವರ್ಲ್ಡ್ ಮತ್ತು ಲ್ಯಾಕ್ಮಿ ಮೇಕಪ್ ಅಕಾಡೆಮಿಯ ಸಹಯೋಗದಲ್ಲಿ ಹಾಗೂ ನೃತ್ಯ ಸಂಯೋಜನೆಯಲ್ಲಿ ಪರಿಣತಿ ಹೊಂದಿರುವ ನಿರ್ದೇಶಕಿ ಸುಮಾ ಅವರ ಮಾರ್ಗದರ್ಶನದಲ್ಲಿ ನಡೆಯಿತು. ಆಧುನಿಕ ಯುಗದಲ್ಲಿ ತಂತ್ರಜ್ಞಾನ ಬೆಳವಣಿಗೆ ಜೊತೆಗೆ ಬದಲಾವಣೆಯ ದಾರಿಯಲ್ಲಿ ಸಂಸ್ಕೃತಿ, ಜೀವನಶೈಲಿ ಕೂಡ ಬದಲಾವಣೆ ಕಾಣುತ್ತಿವೆ. ಸ್ಪೋರ್ಟ್ಸ್, ಗೇಮಿಂಗ್, ಸಾಂಪ್ರದಾಯಿಕ ಕರಕುಶಲತೆಯಿಂದ ಹಿಡಿದು ವಿವಿಧ ಥೀಮ್‌ಗಳ ವಿನ್ಯಾಸಗಳ ಪ್ರದರ್ಶನವನ್ನು ಕೈಗೊಳ್ಳಲಾಯಿತು. ಕಾರ್ಯಕ್ರಮದಲ್ಲಿ ಅತ್ಯುತ್ತಮವಾಗಿ ವಿನ್ಯಾಸಪಡಿಸಿದ ವಿದ್ಯಾರ್ಥಿಗಳಿಗೆ ಪ್ರಶಸ್ತಿಗಳನ್ನು ನೀಡಲಾಯಿತು. 

ಪ್ರಶಸ್ತಿ ವಿಜೇತರ ಪಟ್ಟಿ ಹೀಗಿದೆ:

1 ಆಶಾ ಪವಿತ್ರ, ಗೋಕುಲಪ್ರಿಯ ಆರ್ ಮತ್ತು ನಿತ್ಯ ಕೆ ಎ -  "ಬ್ಲ್ಯಾಕ್ ಮಿರರ್" 

2 ಅಮೂಲ್ಯ ಡಿ ಎಚ್, ಬಿಂದು ಕೃಷ್ಣ ಕೆ ಮತ್ತು ಪೂಜಾ ಇರಾನ್ನಾ ಗೋಟೂರ್ -"ಇಕಿಗೈ" 

3 ಪಿ ವಿ ನಾಗೈಂಪನ, ಚಾಲ್ಸಿ ಕೆ ಜೆ ಮತ್ತು ಫಿರ್ದೌಸ್ ಫಾತಿಮಾ - "ಅರ್ಬನ್ ಬ್ಲೂಮ್ʼ ಥಕ್ಕರ್ ಹರ್ಷಿತಾ ಅತುಲ್, 4 ಥಕ್ಕರ್ ಹೃಷಿತಾ ಅತುಲ್ ಮತ್ತು ಅಕೃತಿ ನೇಗಿ - "ಮುಜೋ" 

5. ಶಶಾಂಕ್ ವಿ, ಭೂಮಿಕಾ ಪಟೇಲ್ - "ಟ್ರೊಂಪೆ ಎಲ್'ಒಯಿಲ್"

6. ಪ್ರೇರಣಾ ಸಿ, ಸಾನಿಯಾ ಖಾನ್ ಮತ್ತು ಧನುಸಿಯಾ ಬಿಜಿ - "ಇಮಿಟೇಟೆಡ್‌ ಆರ್ಟ್‌"

7 ತ್ರಿವೇಣಿ ಆರ್ ಮತ್ತು ಪೌಲಿನಾ ಹೆಮಿಶ್ ಐ -  "ದಿ ಬೌಂಡ್ಲೆಸ್ ಸ್ಕೇಟರ್ಸ್"   

ಜೆಡಿ ಡಿಸೈನ್ ಪ್ರಶಸ್ತಿ ಪ್ರದಾನ ಕಾರ್ಯಕ್ರಮವು ಈವರೆಗೆ 25 ಸಾವಿರಕ್ಕೂ ಅಧಿಕ  ವಿದ್ಯಾರ್ಥಿಗಳಿಗೆ ಉದ್ಯೋಗಾವಕಾಶಕ್ಕೆ ಬುನಾದಿಯಾಗಿದ್ದು, ಸೃಜನಶೀಲ ಮತ್ತು ನಾವೀನ್ಯತೆ ಕೌಶಲ್ಯವನ್ನು ಬೆಳೆಸಲು ವೇದಿಕೆಯಾಗಿದೆ. ಪ್ರಸಕ್ತ ವರ್ಷ ಉದ್ಯಮದ ನಾಯಕರೊಂದಿಗೆ ನೆಟ್ವರ್ಕಿಂಗ್ ಬೆಳೆಸಿಕೊಳ್ಳಲು ಅವಕಾಶ ಮಾಡಿಕೊಡಲಾಗಿತ್ತು. ಅಲ್ಲದೆ ಕಾರ್ಯಕ್ರಮದಲ್ಲಿ ಭಾಗವಹಿಸಿದವರಿಗೆ ವೃತ್ತಿಬದುಕಿಗೆ ದಾರಿ ಮಾಡಿಕೊಡುವಲ್ಲಿಯೂ ಈ ಕಾರ್ಯಕ್ರಮ ನೆರವಾಯಿತು.

ಕಾರ್ಯಕ್ರಮದ ಕುರಿತು ವ್ಯವಸ್ಥಾಪಕ ಟ್ರಸ್ಟಿ ನೀಲೇಶ್ ದಲಾಲ್  ಮಾತನಾಡಿ, ಈ ವೇದಿಕೆಯ ಮೂಲಕ ಪದವೀಧರರನ್ನು ಅಂದ್ರೆ ವಿದ್ಯಾರ್ಥಿಗಳನ್ನು  ಪ್ರೇರೇಪಿಸುವ ಕೆಲಸವಾಗುತ್ತಿದೆ. ವಿದ್ಯಾರ್ಥಿಗಳು ತಮ್ಮ ಸೃಜನಶೀಲತೆಯನ್ನು ಅಭಿವೃದ್ಧಿಪಡಿಸಿಕೊಂಡು ಉತ್ತಮ ಭವಿಷ್ಯ ಕಂಡುಕೊಳ್ಳಲಿ ಎಂಬುದೇ ನಮ್ಮ ಆಶಯ. ಈ ಮೂಲಕ ವಿದ್ಯಾರ್ಥಿಗಳು ನಮ್ಮ ಸಂಸ್ಕೃತಿ ಮತ್ತು ಪರಂಪರೆಯನ್ನು ಅರ್ಥೈಸಿಕೊಳ್ಳಲಿ  ಮತ್ತು ಮುಂದಿನ ದಿನಗಳಲ್ಲಿ ಫ್ಯಾಷನ್‌ ಲೋಕ ಹೆಚ್ಚು ಅಭ್ಯುದಯ ಕಾಣಲಿ ಎಂಬುದೇ ನಮ್ಮ ಆಶಯ ಎಂದು ಅಭಿಪ್ರಾಯಪಟ್ಟರು.

ಜೆಡಿ ಇನ್‌ಸ್ಟಿಟ್ಯೂಟ್‌ ಆಫ್‌ ಫ್ಯಾಷನ್‌ ಟೆಕ್ನಾಲಜಿ:

ಜೆಡಿ ಇನ್‌ಸ್ಟಿಟ್ಯೂಟ್‌ ಆಫ್‌ ಫ್ಯಾಷನ್‌ ಟೆಕ್ನಾಲಜಿಯನ್ನು 1988 ರಲ್ಲಿ ಸ್ಥಾಪಿಸಲಾಗಿದೆ. ಜೆಡಿ ಇನ್ಸ್ಟಿಟ್ಯೂಟ್ ಆಫ್ ಫ್ಯಾಷನ್ ಟೆಕ್ನಾಲಜಿ ಬಹು ಪ್ರಶಸ್ತಿ ವಿಜೇತ ಸಂಸ್ಥೆಯಾಗಿದ್ದು, ವಿವಿಧ ವಿಷಯಗಳಲ್ಲಿ ಸೈದ್ಧಾಂತಿಕ ಮತ್ತು ಕೈಗಾರಿಕಾ ಮಾನ್ಯತೆಯ ಸಂಯೋಜನೆಯೊಂದಿಗೆ ಪ್ರಸಿದ್ಧ ಸೃಜನಶೀಲ ಶಿಕ್ಷಣವನ್ನು ಒದಗಿಸುವಲ್ಲಿ ಮುಂಚೂಣಿಯಲ್ಲಿದೆ. ಬೆಂಗಳೂರು ಸೇರಿದಂತೆ ಗೋವಾ, ಕೊಚ್ಚಿ, ಹೈದರಾಬಾದ್ ಮತ್ತು ವಿಜಯವಾಡಗಳಲ್ಲಿ ಕಲಿಕಾ ಕೇಂದ್ರಗಳನ್ನು ಹೊಂದಿದೆ. ಈ ಸಂಸ್ಥೆಯು ತನ್ನ ಪದವಿಪೂರ್ವ, ಸ್ನಾತಕೋತ್ತರ ಮತ್ತು ಡಿಪ್ಲೊಮಾ ಕಾರ್ಯಕ್ರಮಗಳ ಮೂಲಕ ಫ್ಯಾಷನ್, ಒಳಾಂಗಣ ವಿನ್ಯಾಸ, ಗ್ರಾಫಿಕ್ ವಿನ್ಯಾಸ, ಉತ್ಪನ್ನ ವಿನ್ಯಾಸ, ಆಭರಣ ವಿನ್ಯಾಸ, ಛಾಯಾಗ್ರಹಣ, ಮೇಕಪ್ ಮತ್ತು ಕೇಶವಿನ್ಯಾಸ ಕಲಾತ್ಮಕತೆ ಸೇರಿದಂತೆ ಹಲವು ಕೋರ್ಸ್‌ಗಳನ್ನು ವಿದ್ಯಾರ್ಥಿಗಳಿಗೆ ನೀಡುತ್ತಾ ಬಂದಿದೆ.