“ಹಬ್ಬದ ಹೆಸರಿನಲ್ಲಿ ಹಸಿರು ಹತ್ಯೆ ಜೆಲ್ಯಾಕ್ಕಸ್ ಜೆವೆಲ್ಲೆರ್ಸ್ : ರಾಜಾಜಿನಗರದಲ್ಲಿ ಪರಿಸರದ ಮೇಲೆ ವ್ಯಾಪಾರ ದೌರ್ಜನ್ಯ!

 **“ಹಬ್ಬದ ಹೆಸರಿನಲ್ಲಿ ಹಸಿರು ಹತ್ಯೆ ಜೆಲ್ಯಾಕ್ಕಸ್ ಜೆವೆಲ್ಲೆರ್ಸ್ : ರಾಜಾಜಿನಗರದಲ್ಲಿ ಪರಿಸರದ ಮೇಲೆ ವ್ಯಾಪಾರ ದೌರ್ಜನ್ಯ!

**“ಅಕ್ಷಯ ತೃತೀಯ ಸಂಭ್ರಮವೇ? ಇಲ್ಲ ಪ್ರಕೃತಿಯ ಸಂಹಾರವೇ? ರಾಜಾಜಿನಗರದಲ್ಲಿ ಹಸಿರಿನ ಮೇಲೆ ವ್ಯಾಪಾರ ದಾಳಿ!”** *ನಟರಾಜ್ ಬಿಪಿ* 

ಬೆಂಗಳೂರು: ರಾಜಾಜಿನಗರದಲ್ಲಿರುವ ಜೋಯಲುಕಾಸ್ ಜುವೆಲರಿ  (Joyalukkas Jewellery) ಆಭರಣ ಮಳಿಗೆಯಲ್ಲಿ ಅಕ್ಷಯ ತೃತೀಯ  (Akshaya Tritiya) ಅಂಗವಾಗಿ ಘೋಷಿಸಿರುವ ಭರ್ಜರಿ ಆಫರ್‌ಗಳು ವ್ಯಾಪಾರಿಕ ಚಟುವಟಿಕೆಯ ಭಾಗವಾಗಿದ್ದರೂ, ಅದರ ಹೆಸರಿನಲ್ಲಿ ಪರಿಸರ ಹಾನಿ ನಡೆಯುತ್ತಿರುವುದು ಅತ್ಯಂತ ಗಂಭೀರ ಮತ್ತು ಖಂಡನೀಯ ಸಂಗತಿಯಾಗಿ ಹೊರಹೊಮ್ಮಿದೆ.

ಪರಿಸರ ಸ್ನೇಹಿ ಟ್ರಸ್ಟ್ ಅಧ್ಯಕ್ಷರಾದ ನಟರಾಜ್ ಬಿ.ಪಿ  ಅವರು ತೀವ್ರ ಆಕ್ರೋಶ ವ್ಯಕ್ತಪಡಿಸಿ, “ಗ್ರಾಹಕರನ್ನು ಆಕರ್ಷಿಸಲು ಮಳಿಗೆ ಅಲಂಕಾರ ಮಾಡುವುದು ವ್ಯಾಪಾರಿಗಳ ಹಕ್ಕು ಎಂಬುದು ಸತ್ಯ. ಆದರೆ ಅದಕ್ಕಾಗಿ ಜೀವಂತ ಮರಗಳನ್ನು ಕಡಿದುಹಾಕುವುದು ಅಥವಾ ಮರಗಳಿಗೆ ಅತಿಯಾದ ವಿದ್ಯುತ್ ದೀಪಾಲಂಕಾರಗಳನ್ನು ಹಾಕಿ ಅವುಗಳ ಜೀವಚಕ್ರಕ್ಕೆ ಹಾನಿ ಉಂಟುಮಾಡುವುದು ನೇರವಾಗಿ ಪ್ರಕೃತಿಯ ಮೇಲೆ ನಡೆಯುವ ಹಿಂಸಾಚಾರ. ಇದು ಕೇವಲ ಅಜಾಗರೂಕತೆ ಅಲ್ಲ — ಇದು ಸಮಾಜದ ವಿರುದ್ಧದ ಜವಾಬ್ದಾರಿಯಿಲ್ಲದ ವರ್ತನೆ ಮತ್ತು ಕಾನೂನು ಉಲ್ಲಂಘನೆಯಷ್ಟೇ ಗಂಭೀರವಾದ ಕ್ರಮ” ಎಂದು ಕಿಡಿಕಾರಿದರು.

ಅವರು ಮುಂದುವರಿದು, “ಮರಗಳು ಕೇವಲ ಅಲಂಕಾರದ ವಸ್ತುವಲ್ಲ, ಅವು ಜೀವಜಗತ್ತಿನ ಅಸ್ತಿತ್ವದ ಆಧಾರ. ಇಂತಹ ಮರಗಳನ್ನು ಕಡಿದು ಹಾಕುವುದು ಅಥವಾ ಅವುಗಳ ಮೇಲೆ ಅತಿಯಾದ ವಿದ್ಯುತ್ ದೀಪಗಳನ್ನು ಹಾಕಿ ಅವುಗಳನ್ನು ಹಿಂಸಿಸುವುದು ಮಾನವೀಯತೆಯೇ ಇಲ್ಲದ ಕೃತ್ಯ. ಕೆಲವೇ ದಿನಗಳ ಹಬ್ಬದ ಹೆಸರಿನಲ್ಲಿ ಶತಮಾನಗಳ ಕಾಲ ಬೆಳೆದಿರುವ ಮರಗಳನ್ನು ನಾಶಪಡಿಸುವುದು ಅಕ್ಷಮ್ಯ ಅಪರಾಧ. ಇದು ಪರಿಸರದ ಮೇಲೆ ಯುದ್ಧ ಘೋಷಿಸಿದಂತೆಯೇ” ಎಂದು ತೀವ್ರವಾಗಿ ಖಂಡಿಸಿದರು.

“ಇಂತಹ ಘಟನೆಗಳು ಮುಂದುವರಿದರೆ, ನಗರಗಳು ಉಷ್ಣ ದ್ವೀಪಗಳಾಗಿ ಮಾರ್ಪಾಡಾಗುವುದು ಅನಿವಾರ್ಯ. ಈಗಾಗಲೇ ಪರಿಸರ ಸಂಕಟವನ್ನು ಎದುರಿಸುತ್ತಿರುವ ಸಂದರ್ಭದಲ್ಲಿ, ವ್ಯಾಪಾರಿಕ ಲಾಭಕ್ಕಾಗಿ ಪ್ರಕೃತಿಯನ್ನು ಬಲಿಕೊಡುವುದು ಭವಿಷ್ಯದ ಪೀಳಿಗೆಯ ಮೇಲಿನ ದ್ರೋಹ. ವ್ಯಾಪಾರ ಸಂಸ್ಥೆಗಳು ತಮ್ಮ ಸಾಮಾಜಿಕ ಜವಾಬ್ದಾರಿಯನ್ನು ಅರಿತುಕೊಳ್ಳದಿದ್ದರೆ, ಜನರ ಆಕ್ರೋಶಕ್ಕೆ ಗುರಿಯಾಗುವುದು ಖಚಿತ” ಎಂದು ಅವರು ಎಚ್ಚರಿಸಿದರು.

ಇದೇ ವೇಳೆ, ಸಂಬಂಧಿತ ನಗರ ಪಾಲಿಕೆ, ಅರಣ್ಯ ಇಲಾಖೆ ಹಾಗೂ ವಿದ್ಯುತ್ ಇಲಾಖೆಯ ಅಧಿಕಾರಿಗಳ ನಿರ್ಲಕ್ಷ್ಯವನ್ನೂ ಅವರು ತೀವ್ರವಾಗಿ ಪ್ರಶ್ನಿಸಿ, “ಇಂತಹ ಸ್ಪಷ್ಟ ಪರಿಸರ ಹಾನಿ ನಡೆಯುತ್ತಿದ್ದರೂ ಅಧಿಕಾರಿಗಳು ಮೌನವಾಗಿರುವುದು ಇನ್ನಷ್ಟು ವಿಷಾದನೀಯ. ತಕ್ಷಣವೇ ಪರಿಶೀಲನೆ ನಡೆಸಿ, ಹೊಣೆಗಾರರ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳಬೇಕು. ಇಲ್ಲವಾದರೆ ಪರಿಸರ ಹಿತಾಸಕ್ತಿಗಾಗಿ ಹೋರಾಟ ನಡೆಸುವ ಸಂಘಟನೆಗಳು ತೀವ್ರ ಪ್ರತಿಭಟನೆಗೆ ಮುಂದಾಗಬೇಕಾಗುತ್ತದೆ” ಎಂದು ಹೇಳಿದರು.

ನಗರದ ಎಲ್ಲಾ ವ್ಯಾಪಾರ ಸಂಸ್ಥೆಗಳಿಗೆ ಕಠಿಣ ಎಚ್ಚರಿಕೆ ನೀಡಿದ ಅವರು, “ಹಬ್ಬದ ಸಂಭ್ರಮ ಎಂಬ ಹೆಸರಿನಲ್ಲಿ ಪರಿಸರ ಹಾನಿ ಮಾಡುವ ಪ್ರವೃತ್ತಿ ಕೂಡಲೇ ನಿಲ್ಲಬೇಕು. ಇಲ್ಲವಾದರೆ ಸಾರ್ವಜನಿಕರಿಂದ ಬಹಿಷ್ಕಾರ, ಕಾನೂನು ಹೋರಾಟ ಮತ್ತು ತೀವ್ರ ಜನಾಂದೋಲನ ಎದುರಿಸಬೇಕಾಗುತ್ತದೆ. ಪರಿಸರ ಉಳಿದಾಗ ಮಾತ್ರ ವ್ಯಾಪಾರಕ್ಕೂ ಅರ್ಥವಿರುತ್ತದೆ; ಪ್ರಕೃತಿ ನಾಶವಾದರೆ ಲಾಭವೂ ವ್ಯರ್ಥ” ಎಂದು ತೀವ್ರ ಸಂದೇಶ ರವಾನಿಸಿದರು.

ಕೊನೆಯಲ್ಲಿ, “ಹಸಿರು ಉಳಿಸುವುದು ಪ್ರತಿಯೊಬ್ಬರ ಜವಾಬ್ದಾರಿ. ಹಬ್ಬಗಳು ಸಂಭ್ರಮದ ಸಂಕೇತವಾಗಬೇಕು, ನಾಶದ ಸೂಚಕವಾಗಬಾರದು” ಎಂದು ಅವರು ಗಂಭೀರವಾಗಿ ಅಭಿಪ್ರಾಯಪಟ್ಟರು.